شاهيناز: أنا كنت آخر متسابقة قدمت في ستار ميكر.. وأغنية قولي قولي متاخدة من أغنية يونانية

كشفت المطربة شاهيناز، تفاصيل بداياتها الفنية ودخولها برنامج ستار ميكر لاكتشاف مواهب الغناء، وكواليس أغنيتها الشهيرة قولي قولي.

وقالت شاهيناز في حوارها مع الإعلامية إنجي هشام، في برنامج “المنسي”، المذاع عبر شاشة قناة “هي”:  أنا اتربيت في بيت كله فن، بابا الله يرحمه كان بيعزف عود وهو اللي اكتشف موهبتي وأنا مكنتش عارفة ولا حاسة أن صوتي حلو.

 وأول ما اكتشف قدملي في كورال الأطفال بتاع دار الأوبرا اللي كان مؤسسه المايسترو سليم سحاب، واتقبلت في الاختبارات وحضرت حفلات وكنا بنغني أغاني تراثية، وبدأت المشوار.

وتابعت كاشفة تفاصيل تقديمها في برنامج ستار ميكر: لما درست موسيقى كنا عاملين فرقة أنا وأصحابي وأي فرصة تيجي نغني فيها والناس تشوفنا كنا بنروح، زي حفلات في فنادق وأعياد الميلاد.

وفي يوم وأنا قاعدة بتفرج على التليفزيون لاقيت برنامج بيغنوا فيه ولجنة تحكيم وأمير كرارة بيقدمه، وأنا وإيساف أصدقاء من قبل ستار ميكر فكلمته وقولتله على اللي شوفته، قالي ده برنامج ستار ميكر وأمير كرارة صاحبي، وروحنا قدمنا.

وأضافت: أنا كنت آخر متسابق قدم في الموسم الأول، وحظي كان حلو لأن المنتج طارق نور كان موجود وشافني وسمعني وخلاني غنيت أغنية لحن يوناني بولي بولي اللي هي قولي قولي، وقالولي لو عرفتي تغنيها ممكن تكسبي المسابقة دي لأن صوتك يجيبها، وأنا من أول ما سمعتها خطفت قلبي، وتفاجأت من دكتور أحمد الجبالي الموزع قالي كل البنات اللي دخلوا المسابقة دي سمعوا الأغنية ورفضوا ياخدوها.

شاهيناز: مذيعة رفضت ظهوري في برنامجها علشان معنديش فضائح..

قالت المطربة شاهيناز، عن رفض إعلامية ظهورها في أحد حلقات برنامجها بسبب عدم وجود أحداث مثيرة للجدل في حياتها الشخصية.

صرحت شاهينازوقالت: في مذيعة من الموجودين حاليًا رفضت ظهوري في برنامج لأني غيرة مثيرة للجدل، وأنا عرفت بالصدفة، أن هي قالت أن حياتي هادية ومفيش فيها فضائح، وأنا ماليش الحق أطلع أهاجم حد عنده وجة نظر مختلفة عني.

أما عن القرار الذي ندمت على اتخاذه، فعلقت شاهيناز: مقدرش أقول أن في قرار ندمت عليه، لأن شعور الذنب بالنسبة ليا شعور سلبي وأنا مبديش نفسي فرصة إني أعيشه، ولكن أقدر أقول أن أي حاجة حصلت في الحياة أنا محبتهاش أوي كان قرار اتعلم منه، ولكن مبندمش بعتبره درس وعلامة وإشارة.

كما وجهت شاهيناز رسالة للجمهور، قائلة: نفسي الجمهور يبدأ يسمع تاني أغاني حلوة، خلاص إحنا سمعنا كتير هبد ورزع، في معاني في الكلام بقت مفقودة دلوقتي ياريت نرجع نسمعها، إدوا فرصة للناس اللي بتعرف تغني وتقدم فن أنها تبقى موجودة.

الحجاب مبعدنيش عن الفن.. وأنا غير قادة أكون محجبة في الوقت الحالي

تحدثت المطربة شاهيناز، عن فترة غيابها عن الساحة الفترة خلال الفترة الماضية، مؤكدة أن الحجاب لم يكن سبب ابتعادها.

كما أضافت أن كل حاجة في الدنيا قدر وأنا خدت قرار الابتعاد عن الفن بمحض إرادتي ومحدش غصبني، وابعدت وقت ولادة ابني وقررت اتفرغ له تمامًا، وأنا بشوف أن الطفل ده مسؤولية كبيرة وحسيت أن هو أولى بوقتي واهتمامي، وأنا في الفترة دي نفسيًا كنت حاسة إني عايزة ابعد عن كل حاجة، وأفضل جنب ابني أكتر حد بحبه في الدنيا.

واستكملت: فترة غيابي عن الفن خلتني اتجه للحجاب، ولكن الحجاب مبعدنيش عن الفن وبعد ما اتحجبت بـ سنتين أو 3 سنوات غنيت، عملت أغاني اجتماعية ودينية وأنشودة مديح في الرسول، وعملت أغنية اسمها شكرًا أوي وكنت مرتدية الحجاب، والحجاب مكنش عائق في إني أغني.

وتابعت: أي ست في الدنيا لما بتاخد خطوة الحجاب بتبقى مبسوطة، ومين عارف أنا ممكن ألبس الحجاب تاني، أنا مبرفضهوش ولكن في الفترة الحالية أنا غير قادة إني أفضل مرتدية الحجاب، وشيلت الحجاب من حوالي 10 سنين، وعملت ألبومات وأغاني سينجل تاني.

وأضافت: أنا فعلًا اختفيت شوية، ولكن أنا من 2017 لغاية دلوقتي عملت رصيد فني في ناس مختفوش وملبسوش الحجاب معملهوش، أنا عملت ألبومين و6 فيديو كليب، و12 أغنية سينجل، مفيش حد من بنات جيلي عمل ده تقريبًا.

واستكملت: الوسط الفني بيتقبل الممثلة المحجبة عن المغنية شوية، لأن في بعض الموروثات الفكرية في مجتمعنا العربية مبتقبلش ست تكون بحجاب وتغني، يمكن في آخر 4 سنين شوفنا نداء شرارة وهلا رشدي، وفي وقتي الناس مكنتش متقبلة ده أوي.

وعن رأيها في تحريم بعض الفنانيين المعتزلين، لـ الفن، فعلقت شاهيناز قائلة: مقدرش أحكم على بني آدم هو شايف الدنيا من منظور إيه، هو شايف حاجة ممكن أنا مكونش شايفاها، وكل واحد بيختار الأنسب لحياته، وربنا خلقنا عندنا إرادة وعقل والبني آدم خطاء ممكن آخذ قرار وارجع بكره أندم عليه.