الإعلامية أميرة عبد العظيم: استضافت عادل إمام في أول حلقات برامجي علشان لما أطلب أي نجم يجيلي

كشفت الإعلامية أميرة عبد العظيم، تفاصيل إجرائها 3 لقاءات تلفزيونية على الرغم من ندرة ظهوره الإعلامي، وكيفية إقناعه بالظهور.

وقالت أميرة عبد العظيم، في حوارها مع الإعلامية إنجي هشام، في برنامج “المنسي”، المذاع عبر شاشة قناة “هي”: أنا عملت 3 لقاءات مع الزعيم عادل إمام، وأول لقاء كان على الفضائية المصرية، وأستاذ عادل إمام وقتها مكنش بيطلع خالص على التلفزيون وكان بيمشي بـ بودي جاردز، وعلشان تقنعي عادل إمام أنه يدخل التلفزيون لأول مرة كان صعب، ولكني بحب المغامرة حتى لو فشلت يكفيني شرف المحاولة.

وتابعت: أنا كنت عايزة أبدأ كبيرة وأول حلقة ليا على الفضائية المصرية كنت عايزة أثبت نفسي، وتخيلي لما تجيبي عادل إمام في أول حلقة، يبقى كل اللي هيجي بعد كده نجوم، وكلمت عادل إمام وقولتله ممكن أحتفل بعيد ميلاد حضرتك على الفضائية المصرية؟ قالي موافق وأنا مصدقتش نفسي.

وأضافت: لما جيت أعمل برنامج ليلتي قولت لازم أول حلقة أجيب عادل إمام، علشان لما أبدأ كبيرة أي نجم أكلمه هيجي، وتالت مرة كانت سهرة خاصة عملتها في قصره في المنصورية، وأنا بعتبر نفسي محظوظة إني قابلت زعيم الفن العربي 3 مرات.

وبرنامج المنسي، من تقديم الإعلامية إنجي هشام على شاشة قنا هي، ويُعرض يومي الخميس والجمعة من كل أسبوع في تمام الساعة الحادية عشر مساءا، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
https://youtu.be/LoOS9hzF45g?si=2O6HuF4DqXl8erx-

التلفزيون المصري كان أمل أي نجم عربي.. وشريف عامر لم يُخطئ في مداخلة الزعيم

علقت الإعلامية أميرة عبد العظيم، على الهجوم الذي لاحق الإعلامي شريف عامر بسبب مداخلة الزعيم عادل إمام بعيد ميلاده، بسبب عدم توجيه عدد كبير من الأسئلة له.

وقالت أميرة “: كل برنامج وله ظروفه، وأستاذ شريف عامر إعلامي كبير وأكيد مش هيفوته حاجة زي دي، ولكن لازم نراعي الظروف اللي كان بيتكلم فيها، والظروف اللي الزعيم عادل إمام كان بيتكلم فيها، إحنا مش عارفين هو مرتاح ولا لأ ومبسوط ولا لأ، فلازم نبقى عاملين حساب، ومنقدرش نجازف ونقول حاجة مش عارفين ردة فعلها.

وتابعت: أعتقد أن شريف عامر عمل اللي كان يجب يعمله في ظروف المكالمة، ممكن لو كان لقاء كان يسمح له أنه يسأل، ولكن المكالمة مش هتسمح، خلاص هو طمنا وسمعنا صوت عادل إمام، هنعوز إيه تاني؟.

وأضافت: أنا لما عملت برنامج ليلتي كنت البرنامج الوحيد اللي بيستضيف نجوم، لكن دلوقتي نجوم كتير أوي متوزعين على قنوات كتير أوي، وزمان التلفزيون المصري كان هدف وأمل لأي فنان ونجم مصري أو عربي، وكان بالنسبة لهم ده تكريم وتشريف.

اكتفيت من برامج المنوعات وأتمنى ارجع بـ برنامج عن مصر.. وتاريخ الزعيم مٌشرف

أعربت الإعلامية أميرة عبد العظيم، عن اشتياقها للعودة على الساحة الإعلامية من جديد، بجانب تعليقها على الشائعات التي لاحقت الزعيم عادل إمام.

وقالت “: أكيد طبعًا نفسي أرجع، ولكن أرجع بحاجة تستفزني إني أرجع، وأنا خلاص اكتفيت من البرامج المنوعات لأني خلاص مش هعمل أكتر من اللي أنا عملته.

وتابعت: نفسي أعمل برامج اجتماعية ونفسي أعمل برنامج قدام الأهرامات، وأعمل برنامج بيتكلم عن مصر، رموز مصر ومثقفين ومصر ونجوم مصر، برنامج بيتكلم عن مصر قدام الأهرامات الثلاثة، وعندي حلم من سنين إني أعمل البرنامج ده، ولكن مين المنتج اللي هيعملي ده.

أما عن الشائعات التي لاحقت الزعيم عادل إمام، فعلقت أميرة عبد العظيم: إيه يعني لما يعتزل؟ هو قدم لينا كل حاجة حلو في الدنيا، وهو سايب لينا تريخ مشرف كعرب وعمل اللي عليه، إيه يعني لما يرتاح من الضوضاء والدوشة، التمثيل ده مرهق جدًا، وأستاذ عادل إمام قدم كل حاجة حلوة في السينما والتلفزيون والمسرح، وعلى فكرة هو مستريح لكن عايش معانا، إحنا طول اليوم شايفينه وعمرنا ما حسينا أنه مش موجود.

كان حلمي أكون مضيفة طيران.. وهذا سبب عدم شراء عمر الشريف سيارة

كشفت الإعلامية أميرة عبد العظيم، عن بدايتها في الإذاعة والتليفزيون، بجانب الكشف عن تفاصيل لقائها مع النجم العالمي عمر الشريف.

وقالت أميرة “: أنا كنت مضيفة طيران وده كان حلمي، واشتغلت 8 سنين، وبعدين سيبته لأنها شغلانة صعبة جدًا ومرهقة ومالهاش مواعيد وأنا بدأت يكون عندي أسرة وكان هيبقى على حساب البيت، وكان صعب أغير شغلي ولكن والدي الله يرحمه كان بيحلم إني أكون مذيعة، وكانوا طالبين مذيعات في ماسبيرو قولت أجرب وامتحنوني ولجان صعبة جدًا، وحققت لوالدي الحاجة اللي بيحبها وكان حابب أكون مقدمة نشرة أخبار.

وتابعت: واتجهت لبرامج المنوعات والشغل في التليفزيون صعب جدًا ولا يختلف عن الطيران، وأنا أصلًا مبحبش الشغل المرتبط بالمواعيد فالحمد لله شغلانة الطيران والتليفزيون مش مقيديين، وكل شغلانة ليها ضريبة.

أما عن تفاصيل حوارها مع الفنان عمر الشريف، فعلقت أميرة عبد العظيم: أصعب حوار في حياتي كان مع عمر الشريف، لأنه كان حاطط شرط وهو أنه بينام الساعة 10 وإحنا بنطلع هواء من الساعة 12 لـ 2، قالي اعملوا برنامجكم بدري شوية، وهو الفنان الوحيد اللي عملت له استثناء وسجلت له وذيعت الحلقة، هو كان الصعب الممتنع ولكن كان لطيف جدًا في الحوار بتاعه.

وأضافت: النجم العالمي ده كان بسيط جدًا ومكنش عنده عربية، كان بيركب تاكسي، قالي أنا بحب أركب جمب السواق واتفرج على الشوار ويحكيلي على أكله الطعمية والفول دي متعتي، وعلشان كده مكنش بيحب يجيب عربية، كان إنسان جميل بشكل غير عادي.

وبرنامج المنسي، من تقديم الإعلامية إنجي هشام على شاشة قنا هي، ويُعرض يومي الخميس والجمعة من كل أسبوع في تمام الساعة الحادية عشر مساءا، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.