كشفت المخرجة كاملة أبو ذكري عن رأيها في تصريحات بعض الفنانين بشأن رفض تقديم المشاهد الجريئة والتلامس.
وقالت «أبو ذكري»، خلال حوارها مع الإعلامية أسما إبراهيم، ببرنامج «حبر سري»، عبر شاشة «القاهرة والناس» موجه حديثها لهؤلاء الفنانين: «لو شايف إن الشغلانة دي فيها حاجة حرام متشتغلهاش».
وأضاف: «الفن بيقدم ناس في الحقيقة، كل حاجة موجودة في الدنيا، فالممثل مطلوب يقدم كل الأدوار، وده مش معناه إنه يعمل حاجة مبتذلة أو هو حاسس إنها حرام».
وتابعت: «لكن الحاجات أوفر أوي، مثلا المفروض دي حبيبته في حد يضربها بالنار فالمفروض يشدها، فمش عايز يشدها عشان مش عايز يلمسها ده أوفر، أو واحدة أغمى عليها المفروض يشيلها، أو أمه المفروض بيوس إيديها ورأسها، أنا مش بقول مشاهد جنسية، مثلا مشاهد أخ وأخت، أخويا ممكن يحضني».
وأكملت «أبو ذكري»: «وبعدين أقولك ما تتفرجش على مسلسل وروح صلي! مش حاجة لذيذة… الفن من أجمل الحاجات في الدنيا، لو حرمت الفن رجع بقى الفلوس اللي خدتها في الفن، كل جنيه خدته من الشغلانة دي رجعه، وأقول الفن حرام، خلاص أنت حر».
