أعلن الإعلامي أحمد شوبير حارس مرمى الأهلي ومنتخب مصر، رفضه مما حدث من قبل عدد من جماهير رابطة اولتراس النادي الأهلي بعد الخناقة التي حدثت خلال مباراة الأهلي ضد الجونة في مدرجات الثالثة شمال بملعب الجونة.
وتعادل الأهلي مع الجونة 1-1 في المباراة التي جمعت بين الفريقين، أمس السبت، ضمن مؤجلات المارد الأحمر في بطولة الدوري المصري الممتاز.
وقال أحمد شوبير، في تصريحات إذاعية: «أنا بنادي الحقيقة من وقت كبير بزيادة عدد الجماهير في مباريات الدوري وإمبارح زحفت الجماهير خلف الأهلي من المحافظات المجاورة للبحر الأحمر ومن الغردقة ومن القاهرة كمان، ولكن وأنا بتفرج حاسس إن فيه حاجة في المدرجات وبالفعل عرفنا إن فيه خناقة بين جمهور الأهلي وجمهور الأهلي».
وتابع شوبير: «الأولتراس كانوا قاعدين في مدرج الثالثة شمال، فباقي جماهير الأهلي راحوا يقعدوا معاهم قالوا لهم لأ المدرج ده بتاعنا وقامت خناقة بين الطرفين».
وأوضح حارس الأهلي السابق: «يعني يروحوا يقعدوا فين في الشارع.. المدرج مش ملك لحد ملك للجمهور كله وبعدين الأولتراس دول ولاد صغيرين وناس بتفضل تلعب في دماغهم.. فليه حضرتك مين قال لك الملعب بتاعك الملعب بيسع الجميع».
وأضاف شوبير: «متقعدش بقه تقول لي فيه مخبرين سيبك من النغمة دي مبقتش لطيفة وأنت اللي هتخسر في الأخر، عشان إحنا عمالين نحاول نزود عدد الجماهير لكن كده بترجعونا كثير للخلف».
واختتم شوبير: «وبعدين أنت كده أساسا متخليش المدرب يركز ولا اللاعيبة تركز ولا أنت كمان تركز في تشجيع الأهلي أنت مش جاي تتخانق».
